Автомектептің есепшісі жүргізуші куәлігін сатпақ болған

22 қазанда Екібастұз қаласының полиция бөлімшесіне ер адам хабарласып, қаладағы автомектепте бейресми түрде есепші болып істеген әйел өзінің құзырлы органда танысы барын айтып, 2022 жылдың қазан айынан бастап 2023 жылдың ортасына дейін жүргізуші куәлігін алып беремін деп уәде еткен деген шағыммен хабарласты. Полиция департаментінің өкілдері ештеңеден күмәнданбаған «оқушылар» есепшінің жұбайының шотына 150-400 мың арасында (куәліктің категориясына қарай) ақша аударып келген деді. Ақырында құжатын ала алмаған азаматтар құқық қорғау қызметкерлерінің көмегіне жүгінуге мәжбүр болған. Алаяқтың арбауына тек Павлодар облысының емес, көршілес Ақмола облысының тұрғындары да түсіпті.

Заң қызметерлері Екібастұз қаласының 33 жастағы тұрғынын ұстады. Оған 48 адамды алдап, 8 миллион теңгені қалтаға басты деген айып тағылып отыр. Бұл факті бойынша Қылмыстық кодекстің 190-бабының 3-бөлімі, 4-тармағы (бірнеше рет қайталанған алаяқтық іс) бойынша сотқа дейінгі тергеу жұмыстары жүріп жатыр. Күдіктіге сот шақырғанда баруға міндеттеу шарасы тағайындалды. Экс-есепші 3-7 жылға дейін абақтыға жабылуы немесе мүлкін тәркілеп, сол мерзімге қамалуы мүмкін.