Жол-көлік оқиғасы былтыр 22 желтоқсанда Райымбек даңғылында, 7-қалалық ауруханаға жақын жерде болған. Жолаушы Дархан Ахметжанов жүргізуші Ермек Шокебаевамен сөзге келіспей қалып, жанжал кезінде жұдырық астына алған. Әйел есінен танып, басқарусыз қалған автобус бірнеше адамды қағып кеткен. Үшеуі қайтыс болды. Төрт адам, оның ішінде бір бала жарақат алды. Жүргізушінің де миы шайқалған.
Тергеу бірнеше айға созылды, одан кейін сот отырысы болды. Жақында прокурор айыпталушыны сегіз жылға бас бостандығынан айыруды және қаза тапқандар мен зардап шеккендердің отбасыларына өтемақы төлеуді сұраған. Ал бүгін Ахметжанов соңғы сөзінде жүргізуші әйел төбелеске түрткі болғанын айтты.
«Жүргізуші мені жұрттың көзінше балағаттап, көліктен шығармады. Бұл арандатушылық болды. Мен Қылмыстық кодекстің 293-бабының 1-бөлігі (бұзақылық) бойынша өз кінәмді мойындаймын. Бірақ 351-бабтың 3-бөлігі (жолаушының жол жүрісі немесе көлiк құралдарын пайдалану қауiпсiздiгi қағидаларын бұзып, екi немесе одан да көп адамның өлiмiне себеп болған әрекет) бойынша кінәмді мойындамаймын. Себебі Шокебаева есінен танбады және автобусты тоқтатуға мүмкіндігі болды. Соттан кәмелетке толмаған үш балам бар екенін және бұл менің бірінші рет жасаған құқық бұзушылығым екенін ескеруді сұраймын. Мені тек бұзақылық жасағаным үшін жазалауыңызды сұраймын және 351-бап бойынша ақтауыңызды сұраймын. Барлық жәбірленушіден шын жүректен кешірім сұраймын» — деді сотталушы.
Алматы қаласының қылмыстық істер жөніндегі мамандандырылған ауданаралық соты Ахметжановты екі бап бойынша кінәлі деп танып, оны автобус апатынан қаза тапқандардың екі отбасына 22 миллион теңгеге жуық өтемақы төлеуге міндеттеп, сегіз жылға бас бостандығынан айырды.
Комментариев: 0