Audi Брюссельдегі (Бельгия) зауытын жабуды жоспарлап отыр. Automotive News хабарлағандай, компанияға инвестиция салу жөнінде 26 ұсыныс түскен, бірақ оның ешбірі көңілден шыққан жоқ. Кәсіпорынды өз бетімен қайта құрылымдау да қиын.
Audi Брюссельдегі зауытта Q8 e-tron электрокроссоверін құрастырады. Модель сұранысқа ие емес, компания оның өндірісін тоқтату туралы бірнеше айдан бері жоспарлап жүр. Бірақ мамандар кәсіпорынның болашағы жөнінде әлі нақты шешімге келген жоқ.
Өйткені зауыт қала орталығына жақын орналасқан. Бұл логистика мен кәсіпорынды жаңартуға қиындық туғызады, демек зауытты өзге танымал модельді құрастыру үшін қайта құру тым қиын немесе өте қымбатқа соғады. Компания топ-менеджерлері Audi мүлікті сату немесе басқа өнеркәсіп нысаны ретінде пайдалану жолын іздеп жатқанын айтты, бірақ қолайлы шешім табу мүмкін болмай тұр.
Кәсіподақ өкілдері басылымға Audi шығынды тоқтату үшін зауытты мүмкіндігінше тезірек таратқысы келетінін айтты. Егер ол жабылса, 3 мыңға жуық адам жұмыссыз қалуы мүмкін.
Бұған дейін Volkswagen концерні Еуропадағы өндіріс қуатын қысқартуды жоспарлап отырғаны белгілі болған. Бірақ ол кезде Германиядағы белгілі бір құрастыру зауыты мен компонент шығаратын зауыт туралы сөз болған. Соңғы шешім әлі қабылданған жоқ, бірақ VW жұмысшыларға өтемақы төлеу механизмін әзірлеп жатыр.
Комментариев: 0