Aston Martin «Дакарға» қатысады

Aston Martin «Дакарға» қатысады

Dreadnought деп аталатын прототипті Prodrive жасады.

Aston Martin алдағы «Дакарға» қатысу үшін өз командасын құрғанын хабарлады. Жол талғамайтын прототиптерді жасау үшін компания бұл салада тәжірибесі мол Prodrive-пен бірікті. Оның бұған дейінгі жобаларының қатарында бірнеше рет жүлдегер атанған BRX Hunter және Dacia-ның Sandrider-і бар. Соңғысымен Нассер әл-Аттия биыл жеңіске жетті. Расталмаған ақпаратқа сүйенсек, дәл осы Sandrider жаңа Aston Martin-ге негіз болды. Ол Call of Duty ойынына арналған концептінің құрметіне Dreadnought деген атау алды.

Aston Martin «Дакарға» қатысады
Dacia Sandrider

Марка Dreadnought прототипінің техникалық сипаттамасы туралы ақпарат бермеді, бірақ экипаж құрамын таныстырды. Британиялық брендтің намысын WRC-дің тоғыз дүркін чемпионы Себастьен Лёб пен Формула-1-дің екі дүркін чемпионы Фернандо Алонсо қорғайды. Екеуінің де ралли-марафонда тәжірибесі жетерлік. Лёб 2016 жылдан бері жарысқа тұрақты қатысып жүрсе, Алонсо үшін 2027 жылғы «Дакар» мансабындағы екінші дода болмақ. Оның алғашқы марафоны 2020 жылы Toyota Hilux-тың тізгінінде өтті. Сол кезде испаниялық спортшы 13-орын алған.

Атақты автоспортшыларға бразилиялық Лукас Мораес қосылады. Ол «Дакарда» бірінші рет 2023 жылы Toyota Overdrive командасы сапында өнер көрсетті. Мораестің еншісінде ралли-марафонның жүлделі орны, бірнеше арнайы кезеңдегі жеңіс және 2025 жылғы W2RC чемпионы атағы бар.

2027 жылғы «Дакар» Сауд Арабиясында емес, Африкада өтеді. Жарыс 9 қаңтарда Португалияда басталады, кейін спортшылар Мароккоға аттанады. Онда оларды 4.3 мың километрден асатын 12 арнайы кезең күтіп тұр. 6805 шақырымға созылған «Дакар» 23 қаңтарда Марракеш қаласында аяқталады.

Пікірлер: 0

✖
Пікір қалдыру үшін тіркелу немесе кіру қажет.