Астанадағы LRT желісі Қосшыға дейін созылады

Елорда әкімі Жеңіс Қасымбек халықпен кездесуінде жеңіл рельсті көлік құралы туралы айтты. Оның сөзінше LRT желісінің бір тармағы Қосшыға барады.

«Қосшыдан күн сайын қалаға 15–20 мың автомобиль кіретінін білесіздер. Қосшыдан әр күні таңда, сағат 8:00 шамасында 50 мыңнан аса адам қалаға қарай жолға шығады. Салдарынан Тұран, Қабанбай батыр және Мәңгілік ел көшелерінде кептеліс болады. Қосшы нағыз спутник қалаға айналды, сондықтан келесі желіні осы бағытта саламыз», — деді Ж. Қасымбек. Әкім екінші тармақ Тұран даңғылы арқылы ескі теміржол вокзалына жететінін де айтты

Қала басшысы Қосшыға дейін рельс төсеу жұмысы алдағы бір жарым жылда аяқталады деді. Пойыз кей тұста бетон тірек үстімен емес, жер бетімен жүреді. Әкімдік жобаға қажет қаржыны қарызға алады.

Айта кетейік, Астанада жүрдек трамвайға арналған бетон тіректер 2011 жылы бой көтерген. Бірақ жанжалдар мен тергеуге байланысты сегіз жылда жалпы жұмыстың 15 %-ы ғана орындалды. Тіпті құрылыс тоқтап қалған, 2022 жылы президент тапсырмасымен қайта басталды. Шенділер жолды былтыр ашуға уәде еткен, бірақ мерзімін тағы кешіктіріп, биыл қыкүйекте ғана іске қосты. LRT келер жылдан бастап жолаушы тасиды. Қазірше 18 станция бар, олар:

• «Әуежай»;
• «Атамекен»;
• «Есіл»;
• «Мәңгілік ел»;
• «Астана жұлдызы»;
• «Нұра»;
• «Университет»;
• «Ұлы дала»;
• «Астана Арена»;
• «Жекпе-жек сарайы»;
• «Сығанақ»;
• «Бәйтерек»;
• «Министрліктер үйі»;
• «Ұлттық музей»;
• «Театр»;
• «Мыңжылдық аллеясы»;
• «Жібек жолы»;
• «Нұрлы жол».