ҚР премьер-министрі Әлихан Смайылов шенділер халықаралық сарапшылар мен қоғам пікірін ескере отырып, елордадағы жүрдек трамвай желісінің құрылысын жалғастыру туралы шешім шығарғанын айтты. Бірақ жоба сәл тиімдірек жолмен жалғасады.
«Жобаны қаржыландыруды жалғастырамыз. Күзде қосымша 20 млрд теңге бөлдік. Қаржы игеріле бастағанда, оны жұмсаудың тиімділігін, осы жоба аясындағы мақсаттар мен міндеттердің орындалуын қарастырамыз», — деді үкімет басшысы.
20 млрд теңге (42.6 млн АҚШ доллары) бастамасы ғана. Жобаны жоспардағыдай аяқтау үшін алда кезең-кезеңімен тағы қосымша қаражат бөлінеді.
Астанадағы LRT-ның бетон тұғыры 2011 жылы орнатылған. 2015 жылы қытайлық компаниялар 1.5 млрд долларға жүрдек трамвай желісін салуға кірісті. Біздің ел бұл соманың көбін Қытай банктерінен несиеге алған. Бірнеше қаржылық жанжал болып, 2019 жылға дейін LRT құрылысының 15 %-ы ғана орындалды. Кейін жұмыс тоқтап, жоба жетекшілері сотталды.
Биыл қаңтарда ҚР президенті «жемқорлықтың иісі аңқып тұрған» жобаның тағдырын шешуді тапсырған. Кейін кәсіпкер Айдын Рахымбаев LRT құрылысын жалғастырғаннан гөрі тұғырын сүріп тастау оңай екенін есептеп берді. Оның айтуынша бас қалада жүрдек трамвай салу тиімсіз әрі оған өте көп қаржы кетеді, Қытай банктерінен алған несие өсімін қоса есептегенде, алдағы 20 жылда шығын 4 млрд долларға жетеді.
Комментариев: 0