Билік Astana Smart City жобасы аясында жасанды интеллект негізіндегі бейнеаналитика функциясын енгізіп жатыр. Елорда әкімдігі хабарлағандай, жаңа алгоритм көптеген жол ережесін бұзу әрекетін автоматты түрде тіркей алады. Қаладағы камералар рөлде отырып телефон қолданған, қауіпсіздік белдігін тақпаған және жаяу жүргіншіге жол бермеген жүргізушілерді анықтайды.
Шешімнің технологиялық негізі — бейнені тану және машинаны оқыту, соның арқасында ереже бұзғандарды дәл тауып, деректі жылдам өңдеуге болады. Жаңа камераның дәстүрлі тіркеу кешендерінен айырмашылығы — ол қалалық және мемлекеттік жүйемен біріккен бірыңғай цифрлық инфрақұрылымның бір бөлігі саналады.
Шенділер жобаны енгізу барысында Қазақстанның ақпараттық қауіпсіздік жөніндегі заң талаптары толық сақталады деді. Жүйе сертификаттау рәсімінен өтіп, кезең-кезеңімен іске қосылады.
Қазір жаңа функция сынақ режимінде жұмыс істеп тұр. Әкімдік жүргізушілерге нақты қашан айыппұл салатынын айтқан жоқ.
Алматыда 2026 жылғы 12 наурыздан бері бір айда рөлде отырып телефон қолданған және белдік тақпаған үш мың жүргізуші айыппұл төледі.
Комментариев: 0