Астанада тұрақ ақысын тәулік ішінде төлеуге болады

Тұрақ ақысын кейін төлеу функциясын «Парковки Астаны» мобильді қосымшасы мен astanapark.kz сайтындағы жеке кабинетте қолдануға болады.

«Біз пайдаланушылардың пікірін ескердік. Енді тұрақ ақысын бір күн ішінде төлеуге мүмкіндік бар. Ол үшін тұрақ аймағының нөмірін, тұраққа қою сессиясының басталуы мен ұзақтығын және автомобильдің мемлекеттік нөмірін (техникалық паспорт бойынша) жазу керек. Егер дәл сол күні 23:59-ға дейін төлем жасап үлгерсеңіз, айыппұл салынбайды», — деп хабарлады «Астана тұрақ кеңістігі» ЖШС.

Еске салайық, бас шаһарда ақылы тұраққа көлік қойсаңыз, сағатына 100 теңге төлейсіз. Жұмыс күндері 8:00-ден 20:00-ге дейін қызмет етеді. Демалыс және мереке күндері тұрақ тегін болады.

Қазір тұрақ ақысын уақытылы төлмеген тұрғынға 3 АЕК (9189 теңге) айыппұл салынады.