Оқиға 26 қазан күні кешке болған. Қара түсті жол талғамайтын көліктің полициядан қашқан видеосы әлеуметтік желіде жарияланды.
Астана қалалық ПД хабарлағандай, Land Rover Defender жүргізушісі жол ережесін елемей, төтенше жағдай жасаған. Жоғары жылдамдықпен жүйткіген ол екі рет бағдаршамның қызыл түсіне өтіп, автобус жолағымен жүрді, тіпті полицияның тоқтау туралы талабына бағынбады. Ереже бұзған азаматты полицейлер Республика даңғылындағы көліктер шоғырланған жерде әрең ұстады.
Сараптама нәтижесінде жүргізушінің мас екені анықталды. Оның үстіне бір күн бұрын марихуана шегіпті. 33 жастағы тұрғын екі жыл бұрын мас болып рөлге отырғаны үшін жүргізуші куәлігінен жеті жылға айырылған екен.
Тәртіп сақшылары жүгенсіз жүргізушіні уақытша ұстау изоляторына қамап, атына бес хаттама толтырды. Жүргізуші куәлігінен айырылған соң тағы да мас болып рөлге отырғаны үшін оған 5 000 АЕК (15 315 000 теңге) айыппұл салады немесе сол мөлшерде түзеу жұмыстарына не 1200 сағатқа дейінгі мерзімге қоғамдық жұмыстарға тарту не 5 жылға дейінгі мерзімге бас бостандығын шектеу не сол мерзімге бас бостандығынан айыру жазасы кесіледі.
Оның үстіне өмір бойына көлік жүргізу құқығынан айырылады.
Комментариев: 0