«Астана тұрақ кеңістігі» мекемесіне тиесілі арнайы машиналар тұрақ ақысын төлемеген жүргізушілерді бұрыннан анықтайды. Фотовидеотіркеу құрылғысымен жабдықталған техника бүгін көшенің басқа да бөліктерінде заңсыз тұрған көліктерді көре бастады. Камералар үй аумағына кіретін және шығатын жерлерге, жаяу жүргінші өткелінде, аялдамаға жақын тұрған, иесі екінші қатарға қойып кеткен машиналарды байқайды.
Әкімшілік полиция департаментінің басшысы Елжан Шүпеков Kolesa.kz редакциясына арнайы автомобиль ереже бұзғандарды бір тұрақтан екіншісіне бара жатқанда жолай тіркейтінін айтты. Болашақта елорданың орталық көшелерін де қадағалайды. Кейін оған қозғалысты әуеден бақылайтын квадрокоптер көмекке келеді.
Шендінің айтуынша көліктің заңсыз жерге уақытша аялдамай, тұрақта тұрғанын дәлелдеу үшін айыппұл салғыш машина белгілі бір уақыт аралығында бір аймақтан бірнеше рет өтеді. Электроника анықтаған факт автоматты түрде бірыңғай базаға түседі де, жүргізушіге хаттама жіберіледі. Техникадағы аппарат сертификациядан өткен.
Басқарма басшысы осындай шара қолдануды астанадағы тұрақ иелері сұрағанын атап өтті. Автомобильдің дұрыс қойылмағанын «Дозор-М» құрылғысы GPS/ГЛОНАСС жүйесінің көмегімен тіркейді. Суретте көлік құралының қай жерде қандай уақытта заңсыз тұрғаны нақты көрсетіледі. Айыппұл жазуға адами фактор мүлде әсер етпейді екен. Мұның рас-өтірігін уақыт көрсетеді.
Жол ережесінде «тоқтап тұру — көлік құралының жүрісін жолаушыларды отырғызуға немесе түсіруге не көлік құралын тиеуге немесе түсіруге байланысты емес себептер бойынша бес минуттан асатын уақытқа әдейі тоқтату» деп жазылғанын айта кеткен жөн.
Әкімшілік кодекстің 597-бабы бойынша аялдау не тоқтап тұру ережесін елемегендерге 5-10 АЕК-ке дейін айыппұл салынады. Ал полицейлер көліктің нөмірін алып қана қоймай, оны айыптұраққа жіберуге құқылы.
Комментариев: 0