Астана жаңа Yutong автобустарын сатып алды

Астана әкімі Жеңіс Қасымбек Instagram парақшасында елорда автопаркі толығып жатқанын жазды:

«Қаламызға 90-ға жуық жаңа автобус әкелдік. Осы айда тағы 40 шақты автобус аламыз. Қоғамдық көліктің бір бөлігі — электробус. Жаңа автобустар интеллектуалды бақылау жүйесі, пандус және ерекше қажеттілігі бар жандарға арналған арнайы орынмен жабдықталған. Биыл қоғамдық көлік паркін 400 автобусқа арттыруды жоспарлап отырмыз. Қазір күн сайын жолға орта есеппен 900 автобус шығады. Демек 400 жаңа автобус автопаркті едәуір ұлғайтып, жаңа маршруттарды іске қосуға, автобус күту уақытын қысқартуға, ескі автобустарды кезең-кезеңімен ауыстыруға және т.б. мүмкіндік береді».

Әкім автобустардың бір бөлігі «Өнеркәсіпті дамыту қоры» АҚ арқылы қоғамдық көлікті жеңілдікпен лизингіге алу бағдарламасы бойынша, қалғанын жеке автопарктер өз қаражатына сатып алғанын айтты.

Қасымбек қала билігі нақты қандай автобус алғанын хабарлаған жоқ. Бірақ фотосуреттен елорда көшесіне Қарағанды облысында құрастырған 18 метрлік Yutong ZK6180BEVG шығатынын көруге болады.

Мұндай автобуста үш есік бар, 120 жолаушы (41 орындық) тасымалдауға болады. Тұрақты магниті бар синхронды электромотормен жүреді. Жүріс қоры — 240–350 км.

ӨДҚ Kolesa.kz редакциясына бұл автобустарды бас қала билігі ескі лизинг бағдарламасымен сатып алғанын хабарлады. Ал бұрын жеңілдікті автонесиеге арналған қаражатты автобус алуға жұмсайтын жаңа бағдарлама әлі дайын емес.