Бұған дейін ҚР ІІМ Алматыдағы Арнайы ХҚКО қызметкерлері Оңтүстік Кореядан келген 250 машинаны заңсыз тіркегенін хабарлаған. Олар мемлекетке 340 млн теңге шығын келтіріпті. Полиция мәліметінше қылмыстық топ автомобильдердің шыққан жылын 2018–2020 жылға өзгертіп, жалған құжат жасаған.
ҚР Салық кодексі бойынша бастапқы тіркеу ақысы мынадай болады:
- шыққан жылын қоса есептегенде 2 жасқа дейінгі көлікке — 0.25 АЕК;
- шыққан жылын қоса есептегенде 2–3 жас — 25 АЕК;
- шыққан жылын қоса есептегенде 3 жастан жоғары — 250 АЕК.
«Азаматтарға арналған үкімет» мамандары шыққанына 4–5 жыл болған машинаны үш жаста деп тіркеп, әр көліктен 225 АЕК (2022 жылы 3063 теңге) немесе 689 175 теңге жымқырған.
Мұндай схеманы Ақмола облысының полицейлері де анықтады. Бірақ онда алаяқтар жүк көліктерін заңсыз тіркепті. Қылмыстық топ 2022 жылғы ақпаннан 2023 жылғы сәуірге дейін бастапқы тіркеу ақысын төлегені жөнінде жалған түбіртек пайдаланып, 62 жүк көлігін есепке қойған. Негізгі әр жүк көлігінің алғашқы тіркеу сомасы 7–8 млн теңге болады. Демек мемлекетке 500 млн теңге шығын келген.
Ал Астанада елге машинаны қосалқы бөлшек ретінде жеткізіп, оны шанақ ауыстыру туралы жалған құжатпен тіркегендер анықталды. Яғни, жаңа «шанақты» ескі құжатқа тіркеген.
«Күдіктілер ұсталып, кінәсін мойындады. Олардан заттай айғақтар мен жалған құжаттар тәркіленді. Тергеу жүріп жатыр», — деді ҚР ІІМ Ұйымдасқан қылмысқа қарсы күрес департаментінің бастығы Қанат Нұрмағамбетов.
Комментариев: 0