Жақында Ақтөбедегі 312-атқыштар дивизиясы көшесінде жаңа веложол салынды. Шенділер велосипедшілер жолын таныстыратын есеп беру видеосын да түсіріп тастапты.
Бірақ веложол қала тұрғындарының көңілінен шыққан жоқ. Адамдар @aktobecitizen инстаграм парақшасында сурет жариялап, жауапты мердігер жолды қалай салғанын көрсетті.
Фотосуреттен веложолдың тар, біраз жері үзілген, кей тұсы тіпті қауіпті екенін көруге болады. Жол үстінде бағаналар тұр, жолақты тротуарға қосуды да ұмытып кеткен. Оның үстіне кей жерде бетон жабыны тоза бастапты.
«Веложолды президент пен үкімет тапсырмасын орындау немесе шенділердің суретке түсіп, есеп беруі үшін емес, оны пайдаланатын халықтың ұсыныс-тілегін ескере отырып салу керек», — деп жазды қала тұрғындары.
Ақтөбеде жаңа веложол салу жұмысы 2021 жылы басталды. Жоба 2-3 жылда жүзеге асуға тиіс. Қалада 52 шақырым велосипед жолын салу үшін 1.2 млрд теңге бөлінді.
Комментариев: 0