Маңғыстау жүргізушілері көліктеріне жанармай толтыра алмай жүргендеріне бірнеше күн болды. Lada.kz мәліметі бойынша қаладағы жанармай бекеттерінде кезек көбейді. Халық көгілдір отынды сағаттап күтуге мәжбүр.
«Мұнай шығатын қалада газдың болмауы не деген бассыздық?! Түнде бірнеше жанармай бекетіне бардық, барлық жерде ұзын-сонар кезек. LPG Trade ЖШС газды талонмен ғана сатып жатыр. Бұл талон кімде бар?» — деп жүргізушілер наразылығын білдірді.
Жергілікті шенеуніктер бұл жағдайға қатысты жауап бермеді. Олардың айтуынша аймақта қазір 142 автогаз бекеті жұмыс істейді, газдың жалпы қоры 1230 тоннаны құрайды.
«Жергілікті атқарушы орган тарапынан сұйытылған газ саудасын бақылау және баға өсуіне жол бермеу мақсатында қала мен аудан әкімдіктері күн сайын мониторинг жұмыстарын жүргізеді. Өңірдегі жағдай тұрақты, кейбір бекетте туристердің көптеп келуіне байланысты кезек пайда болды», — деп мәлімдеді облыстық ТКШ басқармасы.
Бұған дейін көгілдір отын Ақтөбе, Шымкент және Түркістан облыстарындағы жанармай бекеттерінде болмаған еді. Алматы жүргізушілері де газ тапшылығына шағымданды. Олардың айтуынша өткен демалыс күндері кейбір бекетте газ болмаған, ал басқалары 3000 теңгеге дейін ғана құйған.
Kolesa.kz редакциясы оқиғаны өз бақылауында ұстайды.
Биыл 1 шілдеден бастап көгілдір отынның шекті бағасы өзгерді: елдегі барлық жанармай құю бекетінде автогаз қымбаттады.
Бұған дейін Энергетика министрлігі сұйытылған газдың бағасы біртіндеп 110 теңгеге дейін өсетінін айтты.
Комментариев: 0