Энергетика министрлігі: газ бағасы өсе береді

Энергетика министрі Алмасадам Сәтқалиев сұйытылған отынның бағасы кезең-кезеңмен көтеріліп, 110 теңге болады деді. Ол газдың қазіргі құны кәсіпорындарды шығынға батырып, өндіріс көлемін азайтқанын тілге тиек етті.

«Бірден артқан сұраныс мәселесін экспортқа шығатын шикізатты ішкі нарыққа бағыттау арқылы шешіп жүрміз, бірақ бұл қор да таусылатыны белгілі. Біз болжамды бағаны ұсынып, көгілдір отын құнын қалтаға салмақ салмайтындай бірте-бірте өсіріп, өз бағасына жеткіземіз. Осылайша өндірушілердің шығындалуына жол бермейміз. Қазір газ 50-80 теңге тұрады (өз құны 110 теңге). Бағаны бірден өсірмейміз, бұл бірнеше кезеңнен тұратын процесс», — деп сендірді министр.

Бұған дейін Сәтқалиев мырза жүргізушілерге дәстүрлі отынды пайдалануға кеңес берген еді.

«Сұйытылған мұнай газының бағасы нарыққа сай келмейді. Ол өндіруші үшін тиімсіз. Біздегі баға аймақтағы ең төмені, бірақ бұл ұзаққа созылмайды. Көлік иелеріне толығымен сұйытылған газға ауыспауға кеңес береміз, себебі ол күннен күнге қымбаттай береді», — деді шенді.

Қазір еліміздегі көгілдір отынның бөлшек сауда бағасын мемлекет реттеп отыр. Қазір газ құю бекеттеріндегі баға мынадай:

• Астана, Ақмола, Қостанай, Қарағанды, Абай, Жетісу, Ұлытау және Шығыс Қазақстан облыстарында — 76 теңге;
• Алматы қаласы, Алматы облысы, Солтүстік Қазақстан облысында — 81 теңге;
• Ақтөбе, Атырау, Маңғыстау облыстарында — 54 теңге;
• Шымкент, БҚО, Қызылорда, Түркістан облысында — 64 теңге;
• Жамбыл облысында — 71 теңге;
• Павлодар облысында — 74 теңге.

Биыл маусымда көгілдір отынның жаңа бағасы бекітілген.