АҚШ жүк көлігін жүргізетін шетел азаматтарына қатаң талап қояды

Америкаға күнкөріс үшін барған шетел азаматтар 2025 жылы ондаған адамның (кей дереккөз зардап шеккендер жүз адамға жуықтады дейді) өліміне себеп болған. АҚШ-та жыл сайын жол апатынан 30–40 мың адам көз жұматындықтан, бұл көрсеткішке аса назар аудармауы мүмкін. Бірақ заңсыз иммиграциямен күрес күшейген тұста бұл дерек бірқатар норманы күшейтуге негіз болып отыр.

Біліктілігі төмен (көбіне ағылшын тілін білмейтін) жүргізушілердің көбеюіне жүк тасымалы саласындағы кадр тапшылығы ықпал еткен. Отыздан аса штат мыңдаған адамға көлік жүргізу деңгейін тексермей-ақ жұмыс істеуге рұқсат беретін құжат (Employment Authorization Document, EAD) табыстады.

Жолдағы тәртіпті ретке келтіру үшін Көлік министрлігі көлік жүргізу деңгейін растай алмаған шетел азаматтарына жүк көлігі мен автобус басқаруға арналған куәлік берілмейтін қаулы қабылдады. Бұл шешім АҚШ-та алыс жолға жүк таситын және коммерциялық көлік құралын тізгіндейтін Орта Азиядан барған мигранттарға тікелей әсер етеді.

Құжат 212 беттен тұрады, ең маңыздылары нормалар мыналар:

• Жұмыс істеуге рұқсат беретін құжатпен (EAD) бұдан былай CDL санатындағы жүргізуші куәлігін (ауыр жүк көлігі, фура және салмағы 12 тоннадан асатын автобус пен арнайы техниканы басқару) алу мүмкін болмайды. Өтініш беруші паспорты мен I-94 формасындағы құжатын беруі қажет.
• CDL куәлігін H-2A (ауыл шаруашылығы жұмысшылары), H-2B (маусымдық жұмысшылар) және E-2 (инвесторлар) визасы бар адам ғана алады немесе ұзарта алады. Ал бұрын берілген куәлік мерзімі аяқталғанша жарамды болып қала береді.
• Аталған санаттағы лицензиялар енді бір жыл ғана жарамды.
• Әрбір өтініш берушінің заңды мәртебесі федералдық SAVE жүйесі арқылы міндетті түрде тексерістен өтеді.

Қаулы 13 ақпанда жарияланып, 30 күннен кейін күшіне енеді.

Кей штат бұдан да қатаң шаралар қабылдап жатыр. Мысалы, 6 ақпаннан бастап Флоридада емтиханды тек ағылшын тілінде тапсыру керек, жазбаша тест кезінде аудармашы пайдалануға рұқсат жоқ. DMV (арнайы ХҚКО-ның аналогы) кеңселері орыс, испан, креол және басқа тілдегі оқу құралдары мен тестілерді алып тастайды.