АҚШ-та сақтандырушылар Hyundai мен Kia-ны сотқа берді

АҚШ-та 70-ке жуық сақтандыру компаниясы Hyundai мен Kia-ны сотқа берді. Мекеме әлеуметтік желіде пайда болған Kia Boyz хештегінен кейін көлік ұрлау жиілегенін және көлік иелеріне төленетін ақша көлемі артқандықтан, шығынға батқанына автоөндірушілер кінәлі деп отыр.

Былтыр TikTok-та Kia және Hyundai автокөліктерін айдап әкету туралы нұсқаулық тарап кетті. Ол үшін қылмыскерде оталдыру тетігіне оңай кіріп кететін смартфон қуаттағышының USB-кабелі болса жеткілікті екен. Америкада қарапайым кәріс машиналарына иммобилайзер орнатпайтыны белгілі болды. Бірнеше ай ішінде ұрлау фактісінің жиі болғаны сонша кейбір сақтандыру компаниялары 2011-2021 жылдары шыққан кей модельдерге полис рәсімдеуден бас тартқан.

Автоны оқушылар да ұрлаған. Олар машинаны шамалы уақыт мініп, жақын маңға тастап кетіп отырған. Арасында соғылғандары кездескен. Кейде жүргізушілер жолда тұрған бірнеше көлікті жанап өтіп, бүлдіріп кеткен.

Сақтандыру компанияларының есебі бойынша Hyundai мен Kia иммобилайзерден үнемдеймін деп индустрияға 190 млн доллар шығын әкелген, әлі аяқталмаған процестермен бұл сома 300 миллионнан асуы мүмкін. Оталдыру тетігін қоспағанда көлік терезесі жөнделетінін ескерсек, ұрлау фактісіне сақтандырушылар кем дегенде 3000 доллар төлейді. Ал егер қылмыскер көшеде жол ережесін бұзып, қоғамдық мүлікке шығын келтірсе, чек 20 000 долларға жетіп қалады.

Қолда бар мәліметке сүйенсек, Америка жолдарында 8.3 млн иммобилайзерсіз Hyundai мен Kia жүр.