Жақын болашақта АҚШ-та жаңа көліктер жүргізушінің мастығын анықтайтын арнайы жүйелермен жабдықталуы мүмкін. Тиісті құжат сенат қарауына берілді.
Заң жобасында техниканың қалай жұмыс істейтіні жазылмаған. Тек аппарат рөлде отырған адамды бақылап, оның ішімдік ішкен-ішпегенін нақты анықтауға тиіс екені көрсетіліпті.
Жолдағы қауіпсіздікті қадағалау бойынша ұлттық басқарма (NHTSA) мұндай жүйелердің бірнешеуін тексерді. Олардың қатарында саусақтың ұшына инфрақызыл сәуле көмегімен жарық түсіру арқылы қандағы алкоголь деңгейін есептейтін аппарат та болды.
Егер заң жобасы қазіргі күйінде қабылданса, көлік департаменті үш жыл ішінде сезгектерге арналған стандарт әзірлеуге міндеттеледі, содан кейін автоөндірушілерге техниканы сатылатын көліктерге орнату үшін екі жыл уақыт беріледі.
Reuters дерегі бойынша АҚШ-та адам өліміне әкеп соққан апаттардың үштен бірін ішімдік ішіп, рөлге отыратындар жасайды екен. Жаңа технологияны қолдану жыл сайын 10 мың адамның өмірін сақтауға ықпал етеді. Сонымен қатар, полицейлер мас күйде көлік басқарған миллионға жуық жүргізушіні ұстайды.
Комментариев: 0