Ақпанда Hyundai-нің саудасы қызды

Ақпанда дилерлер жеңіл коммерциялық техниканы қоса есептегенде 12 405 машина сатты. Одан бөлек елде 710 жаңа автобус пен жүк көлігі иесін тапты. Қазақстан автобизнес қауымдастығы (ҚАБҚ) бұл 2022 жылғы ақпандағы көрсеткіштен 69.1 %-ға жоғары екенін хабарлады. Ал алғашқы екі айда сатылған автомобиль саны былтырғыдан екі есе көп. Дегенмен былтырғы қаңтар автонарық үшін тиімсіз болғанын айта кеткен жөн, ол кезде салондар 4 мыңға жетпейтін көлік саудалады.

Ақпандағы жақсы көрсеткішке ай басында іске қосылған жеңілдікті автонесие оң әсер етті деп болжауға болар еді, бірақ өткен айда банктер 761 өтініш қана мақұлдап, 23 ақпанға дейін 200 машина клиенттер қолына тиді.

Биыл ақпанда автонарық үздік нәтиже көрсетті, 2022 жылы 12 айдың біреуінде ғана бұдан көп көлік сатылған. Оның үстіне өткен айда Chevrolet-нің бір жылға жалғасқан талассыз көшбасшы орнына қауіп төнді. Марка әлі бірінші орында тұр, бірақ Chevrolet (3612) Hyundai-ден (3458) небәрі 154 машина көп сатты. Екі марка да 2022 жылғы ақпанмен салыстырғанда әлдеқайда көп көлік саудалады.

2023 жылғы ақпандағы үздік 10 марка

Үздік үштікке Kia (1815 дана) енді. Төртінші орында Toyota (873) тұр. RAV4 топтамаға қайта оралып, марка саудасы едәуір жақсарды, кроссовер қазір Қазақстанға бұрынғыдай Санкт-Петербургтен емес, тіке Жапониядан келеді. 5–9 орынға Қытай өнімдері жайғасты — Chery (667), Exeed (370), Haval (352), JAC (322) және Changan (247). Ал оныншы орынға Lexus (237) ие болды, ол үздік ондыққа енген жалғыз премиум марка.

1 / 10

• 
• 
• 
• 
• 
• 
• 
• 
• 
• 

1 / 10

Танымал модельдер тізімінде Chevrolet Cobalt әлі көш бастап тұр. Ресми бағасы 6.2–7.3 млн теңге тұратын седанның 2652 данасы иесін тапты. Екінші және үшінші сатыға Hyundai Tucson (1293) мен Nexia (710) тұрақтады.

Топ-10 тізімге бес Hyundai моделі: Tucson, Elantra, Santa Fe, Accent және Sonata енді.