Апатқа түскен жүргізуші сақтандыру сомасының орнына жөндеу қызметін ала алады

Қаржы нарығын реттеу және дамыту агенттігі «Сақтандыру нарығы туралы» заң жобасын әзірледі. Құжат құқықтық базаны оңтайландырып, ескірген және қайталанатын нормаларды жоюға арналған. Нәтижесінде қолданыстағы «Көлік құралы иелерінің азаматтық-құқықтық жауапкершілігін міндетті сақтандыру туралы» заң күшін жояды. Жаңа құжатқа қазіргі заңдағы негізгі нормалар көшеді, сондай-ақ жаңа талаптар қосылады. Ал жүргізушінің сақтандыру класы, аумақтық коэффициент сияқты кей мәселені шеңділер жақында өзгеріс енетін заңнамалық актілер бойынша қарастырады.

Жаңа шарт пен шектеулер

«Сақтандыру нарығы туралы» заңда автомобиль иесі немесе көлік құралы иесінің келісімімен сақтандыру шартын жасаған өзге де жеке немесе заңды тұлға сақтанушы деп танылатыны жазылады.

Полиске тиісті категориядағы көлік құралын басқару құқығы жоқ немесе жүргізуші куәлігінен айырылған адамды сақтандырылған тұлға ретінде енгізуге рұқсат жоқ.

Міндетті сақтандыру шарты заңды тұлға немесе жеке кәсіпкер электросамокатты жалға беру қызметін көрсеткен кезде де жасалуға тиіс.

Ақша орнына машинаны жөндету қызметі

Заң жобасында «сақтандыру төлемін көлік құралын жөндеу құнын төлеу арқылы жүзеге асыруға» арналған жеке бап бар. Атап айтқанда, құжатта машинаны жөндеу дегеніміз «зақымдалған көлік құралын сақтандыру оқиғасы басталғанға дейінгі қалпына келтіру мақсатында жөндеу» екені жазылған.

Жөндеу ақысын сақтандыру компаниясы бағалаушы анықтаған залал мөлшеріне сай және сақтандырушының әрбір сақтандыру жағдайындағы жауапкершілік шегі (600 АЕК, 2026 жылы 2 595 000 теңге) бойынша төлейді. Машинаны жөндеу барысында бұрын қолданылған немесе қалпына келтірілген компонентті пайдалануға болмайды (сақтандырушы мен зардап шегуші арасындағы келісімде басқаша жазылмаса).

Жөндеу құны жауапкершілік шегінен (600 АЕК) асып кетсе, сақтандырушы зардап шегушімен келісу арқылы техникалық қызмет көрсету станциясына зардап шегуші қалтасынан шығаратын қосымша төлем мөлшерін анықтайды әрі бұл соманы жөндеуге берілетін жолдамада көрсетеді.

Сақтандыру компаниясы өзі келісімшарт жасаған станцияларының (ТЖО) тізімін ресми сайтында жариялауға міндетті. Онда орналасқан жері, жөндеуге қабылдайтын көліктердің маркасы мен шыққан жылы, жұмыс кестесі жазылуы керек. Машинаны жөндеу мерзімі көлік құралы ТЖО-ға барған күннен бастап 30 жұмыс күнінен аспауы қажет. Шыққанына екі жылдан аспаған және кепілдікте тұрған машинаны сақтандыру компаниясы дилердің немесе өндірушінің техникалық қызмет көрсету станциясына жібереді.

Көлік құралын жөндеу орнына машина иесі өзі жеткізеді. Ал станция жөндеу жұмысының сапасына жауапты. Кепілдік мерзімі 6 айдан кем болмауға тиіс (міндетті сақтандыру шартында бұдан ұзақ мерзім жазылмаса).