Алматы — Бішкек тас жолының «Алтын Орда» базары маңындағы бөлігіне асфальт жабынының тегіс емес төменгі қабаты ғана төселген, соған қарамастан жол уақытша пайдалануға беріледі. Бұл туралы Алматы облысы әкімдігінің баспасөз қызметі хабарлады. Бірақ құрылыс сапасына қатысты көптеген сұрақ туындап отыр.
Ал жол жөндеушілер алаңдауға негіз жоқ дейді. Kolesa.kz-ке «ҚазАвтожол» ҰК" Алматы облыстық филиалы хабарлағандай, жол жабынының төменгі қабаты ғана төселген жолайрықпен жүруге рұқсат етіледі әрі оның сапасы «соңғы нұсқадан» басқаша болмайды. Көптен күткен жолайрық 2021 жыл аяқталғанша ашылады.
«Көлік қозғалысына ыңғайлы болу үшін жол жабынының төменгі қабаты төселген эстакада ашылады, өйткені жөнделген аумақтың бәрінде төменгі қабат төселген. Егер эстакадаға үстіңгі қабат төселсе, жолда „қарғып-шоршып“ жүруге тура келеді», — деп түсіндірді ұлттық компания. Мұнда олар жол бөлігі түйіскен жерде көліктің өтуін қиындататын баспалдақ пайда болатыны жайлы айтқан болу керек.
Жол жөндеушілердің айтуынша, Райымбек даңғылының жөндеуден өтіп, ашылған барлық бөлігінде осы төменгі (тегіс емес) қабат қана төселген. Оны былтыр жыл соңында «ДДС» компаниясы төсеп, қозғалыс ашылған. Күн суып кеткендіктен, үстіңгі қабатты жатқызуға үлгермеді. Биыл сәуірдің соңында ол компаниямен келісімшарт бұзылды. Ал жаңа мердігерге таға тәрізді көпір мен Іргеліге бұрылатын эстакаданың құрылысын тезірек аяқтау тапсырылды. 6 айда 1200 метрге жуық жолайрық салынды.
«ҚазАвтожолдың» мәлімдеуінше, құрылыс материалдарының қымбаттауы да асфальттың үстіңгі қабатын төсеуге кедергі болды. Жол жөндеушілер 2022 жылы қаржы түсіп, күн жылынғаннан кейін Райымбек даңғылын толық жөндейміз деп уәде берді. Жұмыс сәуірде басталып, маусым-шілде айларында аяқталады деп жоспарланып отыр. Жолдың жоғарғы тегіс қабаты көлік қатынауына кедергі келтірмеу үшін негізінен түнде төселеді.
Комментариев: 0