«Алтын Ордадағы» көпір жартылай жабылды

Алматы — Бішкек тас жолының 16-19-шақырымындағы («Алтын Орда» базарының маңы) эстакаданың бір бөлігі күрделі жөндеу жұмысы және асфальттың үстіңгі қабатын төсеу мақсатында жабылды.

«ҚазАвтожол» ҰК" Алматы облыстық филиалы хабарлағандай, жол жабынының төменгі қабаты төселген эстакаданың жағдайына байланысты арыз-шағым көбейіп кеткендіктен, жол жөндеушілер оны тез арада ретке келтіруді ұйғарды. 2 шілде күні шешім қабылданып, мердігер бірден жұмысқа кірісті.

«ҚазАвтожол» мамандары мақтауын асырғанымен, қазірдің өзінде тоза бастаған асфальттың төменгі қабаты енді жаңасына ауыстырылады. Ал оның үстінен бірден жоғарғы тегіс қабаты төселеді.

Жол жөндеушілер жолайрық пен Райымбек даңғылының жөндеуден өткен барлық бөлігіне биыл сәуірден бастап асфальттың үстіңгі қабатын төсейміз деп уәде берген. Бірақ олай болмады. Сондай-ақ елдің батысындағы тас жолға да асфальттың төменгі қабаты ғана төселген. Ал тегіс қабаты келер жылы жатқызылады. Сонда ол жолдың да төменгі қабаты көп өтпей тозып кете ме? Онда жүздеген шақырым жолды қайта жөндеуге тура келеді.