Алдын ала есеп бойынша, Үлкен Алматы айналма автожолының құрылысына 187 миллиард теңге жұмсалады. Осы мақсатта 8 миллиард теңге тұратын 724 жер телімі босатылған. Almaty.tv хабарлағандай, үйлер сүріле бастапты. Енді тек екі жер телімі ғана қалған, олардың иелері әлі де соттасып жатыр.
Алғашқы болып Қарасай, Іле және Талғар аудандарындағы жүзге жуық үй сүрілді. Сонымен қатар, жол құрылысы үшін жұмысшылар 20 мың ағашты кесуге мәжбүр. Оның орнына мердігерлер жол бойына 60 мыңнан аса тал егуге міндеттеледі. Құрылыс орнында үш жүзге жуық көне қорғандар да бар екен, оларды зерттеу және қазу жұмыстарымен археологтар айналыспақ.
«Өкінішке орай, қорғандардың басым бөлігі тоналған. Егер жолымыз болып, құнды дүние табар болсақ, оны міндетті түрде институтқа апарып береміз, онда істі антрополог ғалымдар қолға алады. Ал егер біз тарихи маңызы бар ештеңе таба алмасақ, онда қорғандарды көміп, құрылысшылардың құзырына береміз. Мұнда барлығы да заң бойынша жүзеге асады», — деді «Қазархеология» ЖШС-інің ғылыми қызметкері Асқар Әбілдин.
Айналма жолдың құрылысы 2021 жылдың соңына қарай аяқталады деп жоспарланып отыр, ал 2022 жылы ол ақылы болады да, көліктердің өтуіне рұқсат беріледі. 16 жыл бойы Үлкен Алматы айналма автожолы жеңіл автокөліктерден 200 теңгеден, ал жүк көліктерінен 290 теңгеден жинайтын концессионерлердің басқаруында болады.
Тас жолдың бастапқы он шақырымға жуық бөлігі төрт жолақты, ал қалған 56 шақырымы алты жолақты болады. Негізгі жабыны — цемент-бетон, ал 20-дан аса көпір мен жолайрықтарға асфальт төселеді.
Комментариев: 0