Алматыдағы үлкен айналма жол қашан ашылады

Жолшылар ағымдағы жылдың екінші тоқсанында айналма жолды ашамыз деп уәде берді (кей мәліметтерде маусым айы деп көрсетілген). Әр бағытқа үш жолақтан алпыс алты шақырым жол салынды. Сағатына 120-150 шақырым жылдамдықпен жүруге мүмкіндік бар. Жол нақты қашан қолданысқа берілетіні тексерістен кейін белгілі болады. Бірақ кіреберісте «Автомагистраль» 5.1 деген белгі тұр. Демек теория жүзінде жолда 140 шақырым жылдамдықпен жүйтки аласыз.

Индустрия және инфрақұрылымдық даму министрлігіне қарасты Автомобиль жолдары комитеті төрағасының орынбасары Жамбыл Бақтияр мұнда көлік жылдамдығы қатаң қадағаланатынын айтты.

«Біз орташа жылдамдықты тіркейтін камералар орнаттық. Жол полициясы аркасынан өткен кез келген көліктің орташа жылдамдығы көрініп тұрады. Орташа жылдамдық туралы заң әзір реттелген жоқ, бірақ айналма жол қолданысқа берілген кезде заң да өз күшіне енеді», — деді шенді.

«Инвестициялар мен операциялар» ЖШС-нің басшысы Нұрланбек Өмірбаев сөзінше биыл бұл жолда автомобиль қанша шақырым жүрсе де 241.5 теңге (0.07 АЕК ), ал автобустар мен жүк көлік тізгіндегендер одан бірнеше есе көп төлейді екен. Айналма жолмен жүруге арналған абонементті Іле, Талғар, Қарасай аудандарының және Алматы облысының тұрғындары ғана рәсімдей алады. Төлем концессионер сайтындағы жеке кабинет арқылы немесе банк қосымшасы арқылы қабылданады. Жол ақысын жеті күн ішінде төлеуге болады.

Н. Өмірбаев мамандар трассаның жоғарғы қабатын төсегенде полимерлі түрленген битум мен шақпақтас-мастикалық асфальтбетон қолданғанын айтты.

«Жабын берік әрі аса төзімді болғандықтан, жүк көліктері үздіксіз жүрсе де шыдас беріп, ұзақ жыл қызмет етеді. Жол тегіс қалпын сақтап, артық шуды болдырмайды, сондықтан жүргізушілер мен жақын маңдағы тұрғындарға жайсыздық туғызбайды. Төселген жол температура өзгерістеріне, ылғал деңгейіне бейімделген, сол себепті әртүрлі климаттық жағдайларда жүру қауіпсіз» — деп атап өтті Алматыдағы үлкен айналма жолды пайдалану және ұстау мекемесінің басшысы.