Рұқсат етілмеген жерде адам отырғызып, жол ережесін бұзатындармен күресу үшін Алматы полициясы кейбір көше қиылысына «Сергек» орнатуды ұйғарды. Әсіресе кешкі уақытта көп жолаушы топтасатын Төле би — Момышұлы, Райымбек — Момышұлы және Райымбек — Әшімов қиылыстарына камера қойылады.
Кешкі қарбалас уақытта үйіне қайтқысы келген жолаушылар жол жиегінде топ-тобымен тұрады. Такси жүргізушілері де ережені елемей екі қатар болып тоқтайды. Соның салдарынан жол бөлігі тарылып, кептеліс туындайды немесе апат қаупі артады.
Жол ережесінің 22.5 тармағына сәйкес, жүргізуші жолаушыны рұқсат етілген жерден ғана отырғызуға тиіс. Егер тыйым салатын жол белгілері болмаса, жүріс бөлігінің шетіне тоқтау қажет. Алматыдағы секілді екінші немесе үшінші жолақта тоқтауға әсте болмайды.
Аталған ережені бұзғандарға Әкімшілік кодекстің 593-бабына сай 5 АЕК айыппұл салынады, егер бір жыл ішінде қайталанса айыппұл мөлшері 10 АЕК болады. Сондай-ақ жүргізуші тоқтау ережесін бұзғаны үшін де 5 АЕК айыппұл төлейді.
«Сергек» ереже бұзған таксистерді қашан анықтай бастайтыны қазірше белгісіз. Жаңа камераларды орнатуға және баптауға біраз уақыт керек болады. «Сергек» жайлы жаңалық бола, Kolesa.kz міндетті түрде оқырманды хабардар етеді.
Комментариев: 0