Мегаполисте қалқыма люк қақпағы 2023 жылы орнатыла бастаған. Жұмыс барысы былай: жол жөндеушілер кәріз құдығына темір шеңберді түсіріп, айналасына асфальт төсейді, содан соң бетіне люк қақпағын жабады. Асфальттың арқасында құрылым берік болады. Көлік жүргенде ол әдеттегі кәріз құдығының бетон іргетасы сияқты құлап қалмайды. Бірақ ол үшін люкті технологияға сай орнату қажет.
2024 жылы Алматыда мамандар 10 мыңнан астам қалқыма люк орнатты. Соның бірі былтыр жазда Гагарин мен Мыңбаев қиылысында пайда болған. Бірақ ол биыл сәуірдің басында орнынан көтеріліп кетті. Адамдар бірнеше рет люкті қайта орнына түсіруге тырысқан, бірақ машина өткенде ол қайта шығып кетеді.
Kolesa.kz редакциясы қалалық мобилділік басқармасына хабарласқан соң апат орнына жөндеу бригадасы келді. Мамандар бұл қалқыма люк екенін айтты. Бірақ қақпағын бетон төсемге қоя салған, құрылымның ішіне темір шеңбер салмаған, ал үстін жұқа асфальтпен тегістепті. Мұндай сапасыз жұмыс көпке шыдамайтыны анық еді.
Жол жөндеушілер кешке қарай кәріз құдығының айналасындағы асфальтты бұзып, жөндеу жұмыстарын түнде аяқтады. Олар жұмысты технологияға сай істеді ме, жоқ па, бақылай алмадық. Жаңа қақпақ қанша уақытқа шыдайтынын уақыт көрсетеді.
Әкімдіктің 2023 жылғы есебі бойынша бір ескі люкті ауыстыруға 120 мың теңге жұмсалады. Шойын люктің өзі 59 мың теңге тұрады. Материалға кеткен соманы есептемегенде мердігер компания 25 мың теңге ақша алады. Ал қалқыма люк жинағы 141 мың теңгеге бағаланған, яғни біршама қымбат. Қалқыма люкті орнату құны да әдеттегіден жоғары болады.
Биыл көктемде жолда көтерліп кеткен қалқыма люк қақпағын байқадыңыз ба? Көрген болсаңыз, мекенжайын әкімдікке жіберу керек.
Комментариев: 0