Біраз уақыт бұрын мегаполис әкімі Бақытжан Сағынтаев Қаскелең мен Талғарға қатынайтын пойызды іске қосу мәселесі қаралып жатқанын хабарлады. Бірақ бүгін қоғамдық тыңдалымда әкімнің орынбасары Серік Құсайынов жеңіл рельсті көлік (LRT) желісін дамыту жобасы қолға алынғанын айтты. Шендінің сөзінше, жүрдек трамвай құрылысымен жеке инвестор айналысады. Төле би көшесінен Талғарға дейін созылып, қос қаланың арасын жалғайтын жол кәсіпкердің өз ақшасына салынады.
С. Құсайынов инвестор табылғанын және жұмыс 2022 жылы басталатынын атап өтті. LRT аяқталған соң ғана жобаға қазынадан қаржы бөлінеді екен.
Еске салайық, Алматыны дамытудың бас жоспарында үш:
- Төле би бойымен Горный Гигант, Қаскелең және Боралдайға бағыт алатын;
- Орбитадан, Төле би арқылы Талғарға баратын;
- Төле биден, «Алматы-1» мен әуежай жаққа баратын LRT желісі салынатыны жазылған.
Сонымен қатар Талғарға автобус қатынауы мүмкін.
Үш жыл бұрын билік бүкіл қаланы LRT желісімен қамтымақ болған. Алайда қала ішінде қозғалатын жүрдек трамвайды іске қосу жайлы қанша сөз болғанмен, жүзеге асар түрі жоқ әрі жыл өткен сайын жоба құны да шарықтап барады.
Комментариев: 0