Брифингте Алматы әкімінің орынбасары Сапарбек Тұяқбаев хабарлағандай, мегаполистегі барлық ТЖО, автодүкен, көлік жуатын орындар мен автосалондардың ашылуына рұқсат беріледі. Бірақ ол үшін infoalmaty.kz сайтына өтінім беріп, артынша тексерістен өту қажет. Аудит барысында кәсіпорындағы санитарлық нормалардың сақталуы тексеріледі. Комиссия шұғыл келіп, нысандарды тексереді де, соған сай шешім шығарады.
Әкім орынбасарының айтуынша, мекемелер санитарлық талаптарды карантин аяқталғанша сақтауы тиіс. Тексеріс үнемі жүргізілетін болады. Егер талаптың бұзылғаны анықталса, кәсіпорын төтенше жағдай режимі аяқталғанша қайта жабылады.
Сапарбек Тұяқбаев infoalmaty.kz сайтында кәсіпкерлер берген өтінім 18:00-ге дейін қабылданатынын хабарлады. Қызмет етуіне рұқсат берілген нысандар қалада еркін қозғалуға мүмкіндік беретін рұқсатнама базасына түнде енгізіледі.
Алматы қалалық Мемлекеттік кірістер департаментінің дерегіне сүйенсек, оңтүстік астанада карантин режимі енгізілгенге дейін 5.4 мың ТЖО мен көлік жуатын орын қызмет көрсетіп, 17 мың адамды жұмыспен қамтыған. Ал дөңгелек ауыстыратын 601 нысанда карантинге дейін 1.5 мың азамат еңбек еткен.
Комментариев: 0