Алматыда жөндеуден өткен жолдар неге тез тозады?

Алматы жолдарында машина жүрген жер жиі шөгіп, ойық пайда болатыны жасырын емес. Билік оның себебін анықтауға енді ғана кірісті. Оңтүстік астанада жол төсемінің температурасы мен ылғалдығын зерттеу үшін автоматты кешен қолданыла бастады. Қалалық мобилділік басқармасы хабарлағандай, екі жерде: Абай даңғылында батыс бағытта Береке көшесімен қиылыста және Гагарин даңғылымен солтүстік бағытта Жамбыл көшесімен қиылыста үш метр тереңге сезгек орнатылған.

Жобаның ғылыми жетекшісі «Жол ғылыми-өндірістік орталығы» ЖШС басшысы Бағдат Телтаевтың айтуынша, температура — жолдың сапасы мен жарамдылық мерзімін анықтайтын негізгі сипаттамалардың бірі. Сондықтан оның әртүрлі уақыттағы өзгеру заңдылығын білу өте маңызды.

«Жүйе жол құрылымының су-жылу режимі параметрін автоматты түрде жинайды. Жазда температураның өзгеру заңдылығы мен сипатын анықтау арқылы асфальтбетонның шөгіп кетуіне жол бермейтін полимер таңдаймыз. Ал қыстағы температураның өзгеру заңдылығы мен сипаттамасын анықтау арқылы асфальтбетонға жарылуға төзімді полимер таңдаймыз. Осылайша гибрид полимерлі асфальтбетон төсейміз», — деді Б. Телтаев.

Әкімдік бұл жобаның ұзақ мерзімге арналғанын әрі қалада тағы бес жерге кешен орнату жоспары бар екенін хабарлады. Мамандар Алматының негізгі жолдарында көлік легінің қарқыны мен құрамын да өлшейді.

Бір-екі жыл бұрын «Жол ғылыми-өндірістік орталығы» ЖШС әкімдіктен 93 млн теңге алып, жолдың тез тозу себептерін зерттеген. Биыл мамырда компания басшысы Бағдат Телтаев ел президентіне жол мәселесі туралы есеп берді, содан кейін ол тағы мемлекеттік тапсырыс алып отыр.

Алматы әкімдігі асфальтқа Америка және Францияның полимерлі қоспасын дәл осы жол ғылыми-өндірістік орталығының ұсынысы бойынша қосып жүр. Б. Телтаев Kolesa. kz YouTube-арнасына берген сұхбатында полимерді зерттеу жұмысы аяқталмағанын әрі қоспа Абай, Әл-Фараби, Жандосов, Тұрғыт Озал, Байзақов және т. б. жолдарда әлі сынақтан өтіп жатқанын айтқан.

Kolesa. kz мысал ретінде Мыңбаев көшесінің сапасыз жөнделгенін атап өтті. Әр жазда температура көтерілген кезде асфальтты әдеттегі қарындашпен тесуге болады, тіпті жаяу адам жүріп өтсе, ізі түсіп қалады. Телтаев бұған аптап ыстық пен ауыр жүк көліктері кінәлі деп санайды.

Шенділер Алматыдағы басты көшелерді жөндеген кезде жаңа полимерлі асфальт төсеп, ол аса жоғары температураға шыдамды болады деген.

Бірақ жөндеуден өткеніне бір жыл толмай жатып Абай даңғылындағы арнайы жолақ автобус пен троллейбустың салмағына шыдамай, шөгіп кетті. Әкімдік шілдеде ауа температурасы жоғары болды әрі мердігер жұмысынан мін табылды деп, жолдағы ақауды құрылысшылар өз қаражатына жөндейтінін айтты. Алайда шенділер Абай, Тимирязев, Жандосов сияқты жақында жөндеуден өткен көшелерді ғана ретке келтіреді. Әкімдік қызметкерлері мегаполистегі басқа көшелерді жөндеуге асықпай отыр, бірақ стандарт бойынша олар бүлінген жолды бес күнде жөндеуге міндетті.

Ұлттық құрылтай отырысында Қасым-Жомарт Тоқаев жол инфрақұрылымын жақсартуды тапсырған.

«Жоғары сапалы жол салу — жалпыұлттық міндет. Оған басымдық берілуі керек. Бірақ жол сапасы ақсап тұр. Тұрғындар жолдың сапасыздығына шағымданады. Оның әртүрлі себебі бар, бірақ ең бастысы — сыбайлас жемқорлық», — деді президент.