Бүгін, 6 ақпанда түнгі 01:00 шамасында оңтүстік астана ақ ұлпаға орана бастады. Таңғы 08:00-ге дейін 20 см қар түсті, ал таулы аймақта қардың биіктігі 30 см-ге жеткен. Қар құрсауында қалған қалада кептеліс орнап, жұрт жаппай жұмыстан кешігуде. Синоптиктердің болжауы бойынша, қар күн ортасына дейін жауады. Алматы қалалық Жасыл экономика басқармасының баспасөз қызметі хабарлағандай, мегаполис көшелеріне 3 100 тонна көктайғаққа қарсы материал төгілген, ал жолдарды 574 арнайы көлік тазалауда. Күндізгі уақытта олардың саны 718-ке көбейіп, іске екі мыңнан аса жұмысшы жұмылдырылады.
Коммуналды мекеме қызметкерлері жүргін жолдағы қарды шығару жұмыстарын таңертеңгі қарбалас бәсеңдегеннен кейін жалғастырады. Осыған орай қала әкімдігі көлік жүргізушілердің қар тазалау жұмыстарына түсіністікпен қарап, әсіресе түнгі мезгілде жол жиегіне көлік қалдырмауларын сұрайды. Тазалық жұмыстарына кедергі келтірген көліктер эвакуатор көмегімен алынады. Қар шығару 7 ақпан күні де жалғасады.
Комментариев: 0