Алматыда жаңа автозауыт іске қосылды

15 қыркүйекте Astana Motors Алматыда іргетасы қаланған жаңа зауытында көлік өндіре бастағанын хабарлады. Astana Motors Manufacturing Kazakhstan (AMMKZ) деп аталған алаң көп брендті, онда Chery, Changan, Haval және Tank көліктері жасалады.

1 / 4

• 
• 
• 
• 

1 / 4

Кәсіпорын жылына 120 000 автомобиль құрастыра алады, онда дәнекерлеу және шанақ бояу жұмыстары жүреді. Зауыт өндіріс деңгейін жақсы автоматтандырған. Мәселен, дәнекерлеуге адамдар ғана емес, Fanuc компаниясының 17 роботы қатысады, олар ең күрделі нүктелермен айналысады. Шанақ бояу цехына ABB фирмасының 22 манипуляторы орнатылады, тағы 12 техника пластик бөлшектерді бояйды.

AMMKZ іске қосылуына орай компания басшылары 16 қыркүйектен бастап өнім құнын 7-15 % түсіреміз деп мәлімдеді. Ол Chery, Changan және Haval маркаларына қатысты. Мақала жарияланған сәтте баға шынымен өзгерген.

Қазақстанда жасалатын Haval модельдерінің арасында M6 және Jolion кроссоверлері, H5 пен H9 бар. 15 қыркүйекте M6-ның құны 9.5-11.1 млн теңге болса, бүгін 16 қыркүйекте 8.9-10.4 млн теңге деп тұр, яғни 6.3 % арзандаған. Базалық Jolion-ның бағасы 10.6-дан 9.7 млн теңгеге (8.5 %) төмендеді. Үздік комплектация бұрын 14.5 млн теңгеден саудаланса, қазір 12.7 миллионға (12.4 %) түсті.

Рамалы ұзын H5 1.5 млн теңге арзандады. Elite нұсқасы 16.6 млн теңге, Premium-ның бағасы — 17.8 млн теңге (—1.7 млн). Бір ғана түрленімі бар қымбатырақ H9 22.9 млн теңгеге саудаланады, кеше құны 23.9 млн теңге еді.

Changan модельдеріндегі өзгеріс өзгеше. Бұрын прайста стандарт баға мен арнайы ұсыныстарды есептегендегі сома жазылатын. Айырмашылық 2 млн теңгеден асатын. Менеджерлер тек төмен бағаны қалдырды. Мысалы, Changan CS55 Plus бұрын 12.9–14.4 млн тұрса, қазір оны 10.4–11.6 млн теңгеге аласыз. Uni-V-дің құны 12 млн теңге (бұрын 14.5 млн еді), Uni-K-дің бағасы 18.9–21.3 млн орнына 16–18 млн теңге болды.

Chery-де жеңілдіктер әзірге ресми прайста көрсетілмеген, бірақ көліктердің екі бағасы бар. Демек, мұнда да дәл сол тәсіл қолданылуы ықтимал. Солай болса, арзан Tiggo 2 7.8 млн емес, 6.8 млн теңге болады, үлкенірек Tigg 4-тің бастапқы құны 8.5 млн теңгеге (бұрын 9.5 млн) түседі, флагман Tiggo 9 кәдімгідей арзандап, 19 млн орнына 17 млн теңгеге сатылады.