Алматы әкімінің баспасөз қызметінде Мұстафин, Рысқұлбеков, Сүлейменов, Жандосов, сонымен қатар Тимирязев көшелеріндегі BRT желісіне қала бюджетінен қанша қаражат кеткенін хабарлады. Құрылыс-монтаж жұмыстарына 4.2 млрд теңге немесе шамамен 12 млн доллар жұмсалған.
BRT желісінің қала үшін тигізер пайдасы жайлы билік басындағылар бірнеше мәрте айтқан болатын. Алдын ала жүргізілген есеп бойынша, барлық жұмыстар аяқталғаннан кейін жол жүру уақыты 30 %-ке кеміп, жолаушылар легі 20 %-ке артады екен. BRT желісі бойынша бірден 18 метрлік 67 «гармошка» автобустар 3-5 минут аралығында қатынайтын болады.
Алайда, таяқтың екі ұшы болатынын ескерген жөн. Жүрдек автобус жолағын онсыз да көлік арылмайтын Тимирязев көшесімен жүргізу туралы шешім қабылданған. Біз BRT желісінің жол қозғалысына әсерін бос жатқан Мұстафин көшесінен-ақ байқағанбыз, ал енді оқу жылының қызған шағында Тимирязев көшесінде не болатынын елестетіп көріңізші. Кептелістің болары анық.
Жан-жақты алып қарасақ, монтаждық жұмыстар қысқа мерзім ішінде жүргізіліп жатыр. Сол себепті жұмысшылар ішінара төте жүруде, мұның салдары жақсы болмайды. Осы бір апта бұрын құрылыс орнында жол-көлік апаты орын алды. Renault Sandero жүргізушісі жарықтанбаған көшенің ортасындағы жол жөндеушілер қоршамаған жаңа шағын телімді байқамай қалған.
Комментариев: 0