Шенділер «Алматы спецтехпаркинг сервис» ЖШС-дегі 30 % үлесін 2018 жылдың соңына дейін сатылымға шығармақ. Қазіргі таңда сату алды жұмыстар жүргізілуде. Болуы мүмкін мәміленің сомасы мен шарттары әзірше белгісіз күйінде қалып отыр. «Вечерний Алматы» газетінің хабарлауынша, сауда электронды форматта, www.gosreestr.kz Мемлекеттік меншік реестрінің веб-порталында өтетін көрінеді.
Алматы қалалық қаржы басқармасының деректеріне сүйенсек, сатылымға шығарылатын 30 % үлес табиғи ресурстар мен табиғат пайдалануды реттеу басқармасына, ал оның қалған 70 %-і — «RR2» ЖШС-не тиесілі екен. Мемлекеттің үлесін дәл осы компанияның (не оның «қыздары» немесе «достары») сатып алатынын болжау еш қиындық туғызбайды.
Осылайша, келесі жылдан бастап алматылық жүргізушілерге қала көшелеріне (негізінде, қала тұрғындарының барлығына тиесілі меншіікке) көлік қою құқығы үшін жеке кәсіпкерлерге ақы төлеу қажет болады. Бұл қаражаттың дәл кімнің қалтасына түсетіні әлеуметтік желілерде бірнеше рет талқыланған болатын, оған көз жүгірту үшін іздеу батырмасын басса жеткілікті.
Ілгеріде алматылық ақ жағалылар оңтүстік астананың өз бетімен көшеде тәртіп орнатуға қауқары жетпейтінін айтқан болатын. Автотұрақтарды жеке қолға беру, біріншіден, бюджет қаржысын үнемдесе, екіншіден, төрт дөңгелекті тұлпарды тізгіндегендерді қала орталығына сирек келуге мәжбүрлеу арқылы «көліктерге емес, адамдарға арналған қала» салу ісіне мұрындық болады-мыс.
Естеріңізге сала кетейік, автокөліктің амандығы үшін оператор мойнына еш жауапкершілік артпастан, тек ақша жинаумен айналысады. Жеке кәсіпкерлерді «пайданың көзіне» жіберген қала билігі бұл жүйенің ештеңесін де өзгертпек емес.
Комментариев: 0