Желтоқсанның басында «Алматы СпецТехПаркинг» басшысы Марат Пірінбеков қаладағы тұрақ орындарына қатысты дифференциалды тариф енгізу туралы ұсыныс жасағанын хабарлады. Басқаша айтқанда, халық арасында көп қолданылатын тұрақтар қымбатырақ, ал сұранысы төмен тұрақтар арзандау болуы тиіс. Мұның қашан іске қосылуы мүмкін екендігін менеджер ашып айтпады, бірақ ол күн алыс емес сияқты.
2019 жылдың аяғында Қасым-Жомарт Тоқаев «Алматы қаласының ерекше мәртебесі туралы» заңға енгізілетін өзгерістерді мақұлдап, қол қойды. Онда жазылған 28 өзгеріс бүгін күшіне енеді. Тізімде шенділердің тұрақ ақысын автоматты реттеуіне мүмкіндік беретін дифференциалды тариф те бар.
Бұрын тарифтің екі нұсқасы жайлы айтылған болатын. Алғашқысына сәйкес, тұрақтағы көлік тығыздығы 80 %-дан асқанда бір сағаттың құны автоматты түрде 50 теңгеге артуы тиіс, ал егер тұрақ орны сұранысқа ие болмаса, онда керісінше 50 теңгеге төмендеуі қажет. Екінші нұсқа төлемді тәулік мерзіміне байланысты бөледі, мысалы, бір тариф 15:00-ге дейінгі, екіншісі одан кейінгі уақытты қамтиды.
Естеріңізге сала кетейік, жол шетіне қойылған көлік үшін төленетін тұрақ ақысы Алматыда сағатына 100 теңгені құрайды. Көшеде паркомат іздемес үшін Kolesa.kz қосымшасының көмегімен төлем жасауға болады.
Комментариев: 0