Алматыда туристерді тағы таксист алдады

Алматыға Душанбеден 8 маусым 22:00 шамасында келген туристер қосымша арқылы такси шақыруға тырысқан, бірақ интернет істемей, әуежай маңындағы жүргізушілердің қызметіне жүгініпті. Ala Park тұрғын үй кешеніне «есептеуіш құралдың» көмегімен апарып тастаймын деген таксист межелеген жерге келгенде жолаушылардан 25 мың сұраған.

«Біз жүргізушіге ол соманы төлеуге келіспедік, бірақ ол өз дегенінен қайтпады. Қалтамызда 16 мың теңге және 800 тәжік сомониі (шамамен 33 мың теңге) бар еді. Жүргізуші бізден барлық ақшаны сыпырып алды. Алданып тұрғанымызды білсек те, басқа амал болмады. Таксист түбіртек беруден де бас тартты. Ақшасыз қалдық, келесі күні банкомат тауып, қолма-қол ақшаға тамақ сатып алдық», — деді қала қонақтары.

Бостандық ауданы полиция басқармасы шетелдіктерден ешқандай арыз түспегенін мәлімдеді, соған қарамастан ашкөз таксисті тауып, оны қамауға алған. Қылмыскер қырық алты жастағы жергілікті тұрғын болып шықты.

Қазір істің мән-жайын анықтауға бағытталған шаралар жүріп жатыр. Такси жүргізушісінің әрекетіне заң бойынша баға беріледі", — деді тәртіп сақшылары.

Бұған дейін Алматыда үндістандық қонақтардан 800 доллар алған таксист істі болған еді.