Жақында әлеуметтік желіде жеке көлікпен адам тасымалдайтын белгісіз азамат туристерден 21 мамырда 800 доллар алғаны туралы ақпарат тарады. Қолданушылар ер адам Алматы әуежайында Үндістан азаматтарын көлігіне отырғызып, калькулятордан 1000 теңге сомасын көрсетіп, қонақүйге жеткіземін деп уәде бергенін айтты. Бірақ діттеген жерге жақындағанда, қонақүй тұрағына кірмей, алыстау жерге тоқтаған жүргізуші жолаушылардан 1180 доллар талап еткен, қорқытып-үркітіп, заттарын қайтармайтынын айтқан. Амалы таусылған туристер арсыз таксистке 800 долларды қолма-қол санап берген. Оның үстіне қала қонақтары ақшаға құныққан азаматқа бағаны түсір деп біраз жалыныпты.
Такси қызметкері өз жолымен кеткен соң Үндістан азаматтары Бостандық ауданының полиция департаментіне арыз түсірген. Жиырма жеті жастағы азамат туристер оны екінші рет Көлсай көлінде кездестіргеннен кейін ұсталған. Қылмескер өз кінәсін толық мойындап, шетелдіктердің материалдық шығынын өтеді. Бір апта бұрын осы жүргізушінің әуежайдан жетіп алу үшін өзге туристке 200 мың теңге төлеткені анықталған. Ол кезде заң бұзушы қоғамдық орында жұрттың мазасын алғаны үшін 21 150 теңге айыппұл төлеп құтылған екен. Бірақ бұл жолы полицейлер қылмыстық кодекстің 194-бабы («Бопсалау») бойынша іс қозғады. Ер адам 13 800 000 теңге (4000 АЕК) төлеуі, сол сомада түзету жұмыстарына, 1000 сағатқа дейін қоғамдық жұмыстарға тартылуы, 4 жылға бас бостандығынан айырылуы немесе мал-мүлкін тәркілеп, сол мерзімге сотталуы мүмкін.
Комментариев: 0