Үш ер адам құрбандарын түнгі клубтардың маңында торуылдаған. Оңтүстік астанадағы Полиция департаментінің баспасөз қызметі хабарлағандай, олар такси жүргізетіндей сыңай танытып, масайып қалған адамдарды көлікке отырғызып алады екен. «Клиентпен» біраз әңгімелескен соң, ойында ештеңе жоқ жолаушыға темекі ұсынады, ал оны шеккен адам есінен танып қалады екен. Содан кейін әлгіні елсіз жерге апарып, қалтасындағы бар затын алып, ес-түссіз жатқан күйінше көшеге қалдырып кете берген.
Тәртіп сақшылары аталған дерек бойынша кінәлі болуы мүмкін деген 1982, 1985 және 1997 жылғы үш ер адамды құрықтап, уақытша ұстау изоляторына жіберген. Қазіргі таңда ҚР ҚК-нің 191-бабы («Тонау») бойынша сотқа дейінгі тергеу жұмыстары жүргізілуде. Егер олардың қылмыс жасағандары дәлелденсе, дүние-мүлкі тәркіленіп, 7 жылға дейін темір торға қамалуы мүмкін.
«Қазіргі сәтте ұсталғандардың осыған ұқсас басқа да қылмыстарға қатысы бар-жоғы тексерілуде. Процессуалдық қажеттілік мақсатында, сонымен қатар күдіктілердің бұл кәсіппен айналысқанына біршама уақыт болуы мүмкін екенін ескере отырып, осы тұлғалар тарапынан құқық бұзушылық әрекетке тап болған азаматтар болса, олардың 254-48-01, 254-48-34, 254-48-09 немесе 102 нөмірлері арқылы хабарласуын сұраймыз», — дейді полицейлер.
Комментариев: 0