Абай даңғылы мен Жандосов, Тимирязев және Сәтбаев көшелеріне 2023 жылы төселген асфальт аптап ыстыққа шыдамай, шөгіп кеткен еді. Ол 7-8 жыл қызмет етуі керек, алайда 12 айға да жетпеді. Қалалық мобилділік басқармасы көлік жүретін бөлікті қазан айында ретке келтіреміз деп уәде берген, бірақ мәселеге мәслихат депутаттары араласқан соң жауаптылар жылдам қозғала бастады.
«Біз Абайға 2 млрд бөлдік, ақша асфальт ауыстыруға, абаттауға және т.б. жұмсалады. Бұл инновациялық, заманға сай, ең жақсы технология бойынша жасалған деп еді, сол технологияны көргеніміз шамалы. Неге? Себебі автобус жолағындағы асфальттың бәрі шөгіп кетті», — деді депутат Тимур Елеусізов.
Бұл сынға жауапты басқарманың басшысы Сағындық Телібаев алты жол бөлігін зертхана көмегімен тексеру нәтижесінде былтыр төселген асфальт аса берік емес екені анықталды. Енді 29 тамызда ойылған жерлерді былтыр жөндеу жүргізген мердігер ұйым кепілдік бойынша ретке келтіреді деп жауап берді.
«Арнайы жолаққа екі қабатты асфальтбетон салу қажет болатын. Астыңғысы ірі түйіршікті. Дәл сондай бөліктер бүлінген. Қазір біз ескерттік, мердігер өз қаражатына үш қабат асфальт төсейді», — деді С. Телібаев.
Басқарма өкілдері жөндеу жұмыстары ертең басталатынын атап өтті. Ал жүргізушілердің бас ауруына айналған ой-шұңқырды қашан жамайтынын ашып айтпады. Бірақ заң бойынша ондай ақау бес күн ішінде жойылуға тиіс.
Комментариев: 0