Естеріңізге сала кетейік, 9 сәуір күні алматылық тұрғын Daewoo Nexia көлігін жалға алып, оның ақысын екі күн кешіктіргенін, ал темір тұлпардың иесі достарымен бірге оны соққыға жығып, әу баста келісілген 14 мыңның орнына, енді 40 мың теңге талап етіп отырғанын айтып, полицияға шағымданған. Кездесу орнына зардап шегушімен бірге полицейлер де келеді. Полицейлер ұстамақ болғанда қарсылық танытқан бопсалаушылар тәртіп сақшыларына пышақ жарақатын салып, оқиға орнынан қашып кетеді. Қала бойынша «Тосқауыл жасау» жоспары құрылып, нәтижесінде қылмыскерлердің екеуі қолға түскенмен, қалған екеуі ізін суытқан еді.
Алматы қалалық Полиция департаментінің баспасөз қызметі хабарлағандай, криминалды полиция қызметкерлері екі қашқынды кеше қолға түсіріпті. Олардың біреуі тіпті елден қашып, көршілес мемлекеттердің бірінде жасырынбақ болған. Келеңсіз оқиға болған күні қаскүнемдер тізгіндеген Subaru көлігі де табылып, қылмыстық істің материалы ретінде тіркелді.
Комментариев: 0