Жергілікті полиция Алматыда 636 мыңнан астам машина тіркелгенін есептеді. Басқа қалада тіркелген жарты миллионға жуық автомобиль күн сайын мегаполиске кіріп-шығады. Осылайша қалада миллионнан астам көлік жүреді. Ал Қазақстанда 5 миллионға жуық автомобиль бар екенін ескерсек, әр бесіншісі Алматыда жүр деген сөз.
«Жол-көлік оқиғасының жиілеуіне Алматы тұрғындары мен қонақтарының мопед пен электросамокат сияқты балама көлік түрлерін пайдалануы әсер еткені бәріне белгілі. Қазір Алматы жолдарында олардың 50 мыңға жуығы бар. Талдау көрсеткендей, зардап шеккендерді қосқандағы жол-көлік оқиғасының жалпы санынан 16.1 %-ы (2023 жылы 617) мопед пен самокат жүргізушілерінің үлесінде», — деді жыл сайынғы халыққа есеп беру кездесуінде Алматы қаласының полиция департаментінің бастығы Арыстанғани Заппаров.
Оның айтуынша, апаттың көбі көше қиылыстарында болады. Мопед жүргізушісі көрінбейтін аймақта болса, автомобилист оны байқамайды. Екі дөңгелекті көлік тізгіндейтіндер жол ережесін білмейді. Шенді жол ережесіне мопед тізгіндегендерге қатысты түзетулер қабылданған соң жағдай жақсаруға тиіс деп атап өтті.
Ережеге өзгеріс енгізу жобасын мәжілісмендер қарастырып жатыр. Онда қозғалтқыш көлемі 50 текшеге дейінгі мопедті А1 санатына жатқызу жоспарланып отыр. Жолда жүру үшін мопед мемлекеттік нөмір, ал жүргізуші куәлік алуы керек. Депутаттар мотоцикл маусымы басталмай тұрып жол ережесін түзетуге уәде берген.
Былтыр 30 тамызда электросамокат жүргізуге қатысты түзетулер қосылып, күшіне енді.
Комментариев: 0