2020 жылы Алматы аумағында күн сайын 34 000 жүк көлігі қатынады. Жасыл экономика басқармасының бастығы Наталья Ливинскаяның айтуынша, пандемия кезінде жүк көлік жүргізушілері Райымбек батыр даңғылынан жоғары жақта жүруге рұқсат алды.
«2021 жылы ластану динамикасы төмендеген жоқ. Осыған байланысты жүк көліктерінің санын қысқарту туралы шешім қабылдадық. Ең алдымен техникалық жабдықталуы экологиялық нормаға сәйкес келмейтін машиналарды тоқтатамыз. Көліктен шығатын улы газды өлшейтін жылжымалы экологиялық патрульдер іске қосылды. Әр жүк көлігі міндетті түрде экопост арқылы тексерістен өтуі керек», — деді Ливинская.
Экологтың айтуынша, қаладағы жүк көліктері жаңартудан өтеді, содан кейін «таза» автокөліктерге жаңадан рұқсат қағаз беріледі. Ал транзиттік жүк көліктерге арнайы қозғалыс бағыты белгіленеді. Осылайша қаланың жоғарғы бөлігінде тәулігіне 500-600 ғана ауыр машина жүреді.
Айта кетейік, биыл наурыз айының ортасында Алматыға кіреберісте бірнеше экопост ашылды. Ал қала көшелерінде көліктен шығатын улы газдың құрамы мен түтінін тексеретін экопатрульдер жұмыс бастады. Бірақ Kolesa.kz тілшілері экологтардың заң талаптарын бұзып, тексеруді атүсті жүргізетінін анықтады. Жасыл экономика басқармасы бұл мәселемен айналысуға уәде бергенімен, шенеуніктерден әлі жауап келген жоқ.
Комментариев: 0