Алматы әкімі Ерболат Досаев экопостан пайда аз екенін айтты. Оның айтуынша мегаполистегі экопостарды жауып, автомобильден шығатын зиян газ мөлшерін жол бойында тұратын арнайы сезгектер арқылы тексеруге болады.
Ол қалай жұмыс істейді?
Sergek Technologies компаниясының бас архитекторы Болат Тәңірберген Kolesa.kz редакциясына экосезгек (экодатчик) деген не екенін және ол қаладағы машина шоғырынан «лас» көлікті қалай анықтайтынын түсіндірді. Маманның айтуынша «Таза ауа» апталығында Алматыдағы экопостар жұмысына баға берілді. Сарапшылар мен қоғам белсенділері бекетте тексерістен өткен машиналардың 25 %-ы ғана зиян газ үшін айыппұл төлейтінін айтты. Себебі экологтармен бірге жұмыс істеп жатқан полицейлер көп көлік арасынан қайсысын тоқтатарын білмейді. Олар көзбен көргеніне ғана сүйенеді, мысалы, ескі машина көп зиян газ шығарады-ау деп тұспалдауы мүмкін.
Экопостар бос тұрмас үшін мамандар «лас» көлікті алдын ала анықтауды ұсынды. Оның екі жолы бар:
- Қала көшелеріне спектрографиялы талдау арқылы «лас» көлікті анықтап, иесіне айыппұл сала алатын шетелде шыққан экосезгек орнату.
- Шетелдік нұсқадан арзан Сергек құрылғысын орнату. Бірақ ол айыппұл салмайды әрі сәл басқа принциппен, бейнебақылау камерасымен бірге жұмыс істейді.
Б.Тәңірберген жол бойына экосезгек орнату үшін бірқатар заңға өзгеріс енгізу қажет екенін айтты. Егер ол импорт өнім болса, оны қолданып айыппұл салу үшін Әкімшілік кодекске өзгеріс енгізу керек. Оның үстіне заңгерлер электроника көмегімен алған дерек айыппұл салуға заңды негіз болады деп таныған жағдайда ғана оны пайдалануға болады.
Отандық құрылғы өз бетінше айыппұл жазбайды. Қазақстандық экосезгек күрделі алгоритм арқылы көшедегі «лас» көлікті анықтап, тізімін жасайды, полиция сол тізім бойынша оларды экопоста тоқтатады. Немесе автопатруль ұстап, тексерістен өткізу үшін экопостқа жібереді.
Сергек авторларының айтуынша қазақстандық сезгек «лас» көлікті бірден байқамайды, белгілі бір аумақтан өткен автомобиль легінен шыққан зиян газ туралы деректі талдайды. Содан кейін оны келесі көшеден алған мәліметпен салыстырады. Осылайша бейнекамера және арнайы алгоритм көмегімен нормадан артық зиян газ шығаратын машинаны анықтайды. Әртүрлі көшеден жиналған деректі талдауға шамамен бір апта уақыт кетеді.
Б.Тәңірберген қазір Алматыда сынақ ретінде он экосезгек орнатылғанын айтты, олар жақсы нәтиже көрсетіпті. Алда тағы он шақтысын орнатады. Биыл күзде заңнамаға өзгеріс енгізу жөнінде үкіметке ұсыныс жолдау жоспарланған. Ол жүзеге асса оңтүстік астана экологиясын электроника бақылайды. Бұл міндетті Сергек арқалай ма, әлде билік импорт өнім әкеле ме, қазірше белгісіз.
Комментариев: 0