«Оператор ЭЗС» ЖШС баспасөз қызметінің Kolesa.kz тілшісіне хабарлауынша, 2021 жылдың екінші тоқсанының соңына дейін Алматыда жаңа станцияларды іске қосу жоспарланып отыр. Олар «Медеу», «Шымбұлақ» және «Лесная Сказка» (пайдалануға беру жұмыстары жүргізіліп жатыр) сияқты туристік және спорттық нысандардың жанына орнатылады. Сонымен қатар жақын уақытта жылдам қуаттау бекеттері еліміздің барлық облыс орталықтарына, автомобиль жолдарына (Алматы — Нұр-Сұлтан және т.б.), табиғи саябақтарға (мысалы Көлсай көлі) қойылады.
Қазір қосылған E-line TG50/100 станциялары (қуаты — 50/100 кВт) әлемдегі барлық электромобильге жарамды. Сонымен қатар қуаттау мен төлемді QR код арқылы жүзеге асыруға болады.
«Оператор ЭЗС» Алматыда 52 бекет орнатқан. Компания өкілдерінің айтуынша, олардың біреуі ғана жұмыс істемей тұр (Гагарин көшесіндегі Магнум маңында). Ал елордада орналасқан 50 станцияның үшеуі жұмыс істемейді («Нұрлы жол» теміржол бекеті, MEGA Silk Way сауда үйінің жаны және «Allur Auto Astana» кеңсесінің жанында). Электромобильді қуаттау бағасы айына 9000 теңге. Ал 2021 жылы 21 қаңтар мен 21 сәуір аралығында ақысыз болады.
Айта кетейік, Алматыда жылдам қуаттағыш Compass және «Газпромнефть» (Шығыс айналма жолда) жанармай құю бекеттерінде орналасқан. Esentai Mall автотұрағында Tesla-ға арналған бекет бар. 2021 жылдың соңына дейін Porsche импортері 10 жаңа станция (Алматыда 8, Нұр-Сұлтанда 2) орнатуға уәде берді.
Комментариев: 0