Жуырда мегаполис полициясы 1955, 1970 және 1982 жылғы үш ер адамды ұстады. Жергілікті ПД баспасөз қызметі хабарлағандай, біреуі алматылық, қалған екеуі облыс тұрғындары екен. 13 мамыр күні күдіктілер Медеу ауданында тұрған Lexus LX 570-ті айдап кетіпті.
«Қаскөйлер арнайы техникалық құралдардың көмегімен машинаны байқатпай ашып, айдап кеткен. Күдіктілердің бірнеше күн көлік иесінің ізін аңдып, қозғалу бағытын анықтағаны белгілі болды. Машинаны иесі кафеде отырған кезде ұрлаған», — дейді тәртіп сақшылары.
Қылмысты ашу үшін арнайы жедел тергеу тобы құрылды. Біаз уақыт өткен соң полиция ұрланған көлік тұрған Талғар ауданына қарасты Бесқайнар ауылындағы үйді анықтайды. Тінту барысында жол талғамайтын машина, оның салонындағы ақша, техникалық құралдар (сигнал бұғаттағыш пен көлік пультінің сигналын қылмыскерлердің қабылдағышына тарататын арнайы антенна), сонымен қатар күдіктілер пайдаланған жасанды шаш пен мұрт тәркіленді.
Ұсталғандар изоляторда отыр. Полицейлердің болжамынша, қылмыс әшкере болмас бұрын олар тағы бірнеше бөтен мүлікті иемденуге дайындалған болуы мүмкін.
Комментариев: 0