Оқиға 11 маусым күні Гагарин — Короленко қиылысында болды. Наразы топ Гагарин даңғылын жауып, Terra тұрғын үй кешеніне тиесілі автотұрақты беруді талап еткен, өйткені жаңа тұрғын үй кешені салынғанда оларға тұрақ жетпей қалыпты. Бір жүргізуші жолды босату үшін топтағылардың бірін ұрып жібереді. Қарсы соққы алған ер адам жерге құлап, басы асфальтқа қатты соғылған.
Полиция мәліметінше тұрғындар рұқсат етілмеген митингіге шыққан. Олар жаңа тұрғын үй кешені салынып жатқан ауданда көлік көбейгенін алға тартып 2019 жылдан бері ауласын жолдан бөліп қоршауды талап етіп жүр. Бұған дейін азаматтардың өтініші бойынша төрт жерге жылдамдықты шектейтін кедергі төселіп, Гагарин және Радостовец жағынан екі шлагбаум орнатылған.
«Наразылыққа шыққан 1980 жылғы М. есімді азамат тосқауылды бұзып өткісі келген 48 жастағы К. есімді жүргізушімен жанжалдасып, оны жаралаған. Жәбірленуші мерт болды. М. есімді тұрғынның әрекеті Қылмыстық кодекстің 106-бабы 3-бөлігі (кісі өліміне әкеп соққан денсаулыққа қасақана ауыр зиян келтіру) бойынша тергеліп жатыр. Күдікті уақытша ұстау изоляторына қамалды», — деді Алматы қалалық ПД баспасөз қызметі. Қылмыстық кодекстің аталған бабына сай ол 8 жылдан 12 жылға дейін бас бостандығынан айырылуы мүмкін.
Полиция рұқсат етілмеген митингті ұйымдастырған төрт тұрғын әкімшілік жауапқа тартылғанын хабарлады.
Комментариев: 0