Алматыда бағдаршам таймерлері қашан жұмыс істейді

Алматыда көше қиылысындағы таймерлерді қашан қайта орнататынын Алмалы ауданының тұрғындары қала әкімінен сұрады.

«Өкінішке қарай, қаладағы 600-ге жуық бағдаршамның тек 93-і „ақылды“, қалғанын жаңарту қажет. Әйтпесе интеллектуалды жүйені енгізе алмаймыз. 2024-2025 жылдары бағдаршам кешенін жаңартуды жоспарлап отырмыз», — деді Ерболат Досаев. Ол бағдаршам таймері нақты қашан қайта қойылатынын айтқан жоқ, бірақ тұрғындарға белгілі бір қиылыста уақыт есептеуіш қажет болса, полиция бөліміне немесе қалалық мобилділік басқармасына хабарласуға кеңес берді.

Шенділер 2018 жылы Алматыда 450 «ақылды» бағдаршам орнатуға уәде берген. Бірақ 2021 жылға дейін мегаполисте мұндай бағдаршамның 93-і ғана пайда болды. Бұл көрсеткіш содан бері әлі өзгермепті. Ал былтыр қаңтарда қала көшелеріндегі таймерлер алына бастады. Әкімдік құрылғыны жөндеп немесе жаңартып орнына қайта орнататынын айтқан. Бірақ бір жарым жыл өтсе де, көптеген қиылыста әлі таймер жоқ.