Компания қазір жаңа терминалдар орнатып жатыр, тұрақ ақысын қолма-қол ақшамен қабылдамайды. Time.kz хабарлағандай, Медеу ауданында ақылы автотұрақ 1 тамызда іске қосылады, Алмалы ауданында — 20 тамызда, Бостандық ауданында қыркүйектің басында ақылы болады.
«1 қыркүйекке дейін жүйені іске қосуымыз қажет. Бірақ бұл жоспарға өзгеріс енуі мүмкін», — деді «Алматы паркинг» директоры Владимир Ни.
Ол тұрақ алаңын, уақыты мен төлем тәсілін көрсететін жаңа белгі орнатқанға дейін оңтүстік астана көшелерінде көлікті тегін қоюға болатынын айтты. Қазір барахолка немесе «Нұрлы тау» БО жанындағы платформа түріндегі тұрақтарда ғана ақы сұралады.
Сондай-ақ В. Ни жүргізушілерден жиналған қаражат енді сол ауданды абаттандыруға жұмсалатынын айтты.
Компания басшысы қала билігі автотұраққа сараланған тариф енгізіп, айлық абонементтен бас тартуды көздеп отырғанын атап өтті.
«Абонементтен бас тартуға тұрғындардың бұл мүмкіндікті теріс бағытта пайдаланғаны себеп болды. Мысалы, „газель“ иелері абонемент сатып алып, қаланың әр түкпіріндегі тұрақтарда күні бойы сауда жасаған. Күні бойы тұрғанымен қоймай, көп қоқыс тастап кетеді. Сол үшін абонемент болмайды, бірақ азаматтарға бұрын берілген жеңілдіктер мен тұрғын үй тұрағы сақталады. Оның бағасы өзгере ме, білмеймін. Ол әкімдіктің жаңа тариф туралы шешіміне байланысты болады», — деді В. Ни.
Әкімдік 15 шілдеден кейін жүргізушілер төлеген тұрақ ақысы қайда кеткенін әлі хабарлаған жоқ. Бұған дейін автотұраққа жауапты болған A-Parking 15 шілдеде қызметін тоқтатқан, бірақ тұрғындарға бұл туралы 20 шілдеде ғана хабарлады.
Комментариев: 0