Алматыда қоғамдық көлікке арналған арнайы жолақтарды салу кезінде жіберілген ереже бұзушылықты жою мақсатында халық арасында «кірпіш» аталып кеткен 3.1 «Кіруге тыйым салынады» белгісі алынып жатыр. Автобус жолақтарының жоғарғы тұсында тек 5.9 «Маршруттық көлік құралдарына арналған жолақ» және асфальттағы «А» таңбасын қайталайтын 5.10.1 «Маршруттық көлік құралдарына арналған жолағы бар жол» белгілері ғана қалады.
Бірақ бұл арнайы жолақтармен кез келген көліктің емін-еркін қозғала беруіне болады деген сөз емес. ҚР ЖҚЕ-не сәйкес, 5.9 белгісімен және тиісті таңбамен айқындалған жолақ тек маршруттық көлік құралдарының және басқа қоғамдық көліктердің жүруіне арналады.
Өзге темір тұлпарлар оған бұрылыс жасау үшін, жолаушыларды түсіру не отырғызу үшін не аулалар мен тұйық көшелерге, тұрақ алаңдарына кіру үшін үзік сызықтармен белгіленген жерлерде ғана өте алады.
Қазақстанда қоғамдық көлікке тек маршруттық автобустар мен троллейбустар ғана емес, қолында тиісті құжаттарымен қатар, төбесіне орнатылған арнайы жарық шамы бар ресми тіркелген такси көліктері де жатады. Оған қоса, иесі тұрақсыз жолаушы тасымалдауға рұқсат алған темір тұлпарлардың барлығы да қоғамдық көлік болып саналады. Яғни, жұмысшыларды нысандарға, балаларды мектепке таситын, т.б. көліктерге де арнайы жолақпен жүруге тыйым салынбайды.
Бүгінде Тимирязев, Сүлейменов, Мұстафин және т.б. көшелерге жүргізілген BRT — қоғамдық көлікке арналған әдеттегі арнайы жолақ.
Комментариев: 0