Алматыда 4 қазаннан бастап тұрақ ақысы қанша болады?

Қала билігі биыл 4 қазаннан бастап Алматыдағы тұраққа дифференциал тариф енгізбекші. «Вечерний Алматы» газеті жаңа тарифті жариялады. Ең қымбат, сағаты 200 теңге тұратын аумақтарға мегаполистің әр бөлігіндегі паркингтер кірген. Олар сауда және ойын-сауық орталықтарының, бизнес орталықтардың, ауруханалар мен базарлардың маңында орналасқан. Оңтүстік астанадағы жүргізушілер кептеліс болмайтын шағын көшедегі орын үшін де сағатына 100 теңге төлейді.

Кестеде кейбір көше 200 теңгелік аймаққа кіріп кетіпті, бірақ олар 150 теңге тұратын аймақтың арасында да тұр. Мысалы, Әуезов екі тізімде бар.

Жауапты орган әлі түсініктеме бермеді. Әзірге жаңа тізім де, картадағы жаңа аумақтар да, Almaty Parking сайтындағы ақпарат та жаңарған жоқ. Компания үй маңындағы тұраққа арналған абонементпен болған жағдайдағыдай, жүргізушілерді алдын ала ескертпей, мәліметті 4 қазанда жаңартуы мүмкін. Дегенмен бір көшенің әртүрлі аумақта қайталануы түсініксіз.