Алматыдан Ыстықкөлге төте жол салу жайлы он жылдан бері айтылып жүр, бірақ түрлі себеппен идея әлі жүзеге асқан жоқ. Жақында Қырғызстан көлік және коммуникация министрлігі жоба туралы нақты шешім қабылданғанын мәлімдеді. Тazabek.kg сайты хабарлағандай, «Жол активін басқару жүйесіндегі мемлекеттік саясат туралы» дөңгелек үстелде Қырғызстан ККМ МЖӘ бөлімінің бастығы Айзада Озбекова жол құрылысы жобасын экономикалық тұрғыда талдау аяқталғанын айтты.
Оның айтуынша тас жол Алматы — Ұзынағаш — Қастек асуы — Қарасай Батыр — Кемин — Ыстықкөл бағыты бойынша салынады. Қазір Алматыдан көлге дейін 450 км жол жүру керек, ал жаңа тас жол ашылса бұл бағыт 279 шақырымға қысқарады. Шенеунік жол құрылысы қашан басталатынын айтқан жоқ, тек жаңа трасса 53 млн доллар табыс әкеліп, Қырғызстанда туризм саласының дамуына серпін береді деген болжам жасады.
Ал Қазақстан билігі жариялаған елдің оңтүстік аймағын дамытудың өңіраралық схемасында ұзындығы 96 км болатын Алматы — Қырғызстан шекарасы — Ыстықкөл тас жолы 2035 жылға дейін салынатыны көрсетілген.
Жобаны қаржыландыратын Азия даму банкі бір жыл бұрын Ыстықкөлге баратын жол ақылы болу керектігін (жол ақысы бір бағытқа мөлшермен 10–20 доллар) мәлімдеді.
Комментариев: 0